想睇花海其實無需遠飛日韓，過深圳已經可以輕鬆投入繽紛花景。無論係情侶、小朋友放電行程，定係閨蜜影相日，深圳都有唔同季節嘅特色花區。以下精選 2025深圳必去賞花熱點，由秋日簕杜鵑瀑布、粉黛亂子草，以至春日櫻花林，附交通及拍攝重點，方便週末即刻話走就走！
目錄
秋季推介
仙湖植物園「七層簕杜鵑瀑布」
大鵬禾塘濕地公園粉黛花海
春季推介
光明農場大觀園櫻花節
三洲田櫻花林
深圳秋季賞花
1. 仙湖植物園｜七層簕杜鵑花瀑布人氣爆登
羅湖區嘅仙湖植物園，今年再次成為社交平台焦點。立體停車場外牆被 簕杜鵑花海 完全包圍，形成多層式「花瀑布」，由粉紅、深粉到紫色層次分明，影相超夢幻。
最方便係：想影花毋須入園買票，在停車場外就影到靚相！
小貼士：
穿淺色或白色系衣服更易影出唯美對比
用長焦鏡可捕捉花瀑層次感
花期一般至10月底，要影相記得早啲安排
地址：深圳羅湖區仙湖植物園立體停車場
地鐵：2號線／8號線「仙湖路站」C3出口步行約 900 公尺
自駕：導航「仙湖植物園南門立體停車場」，需網上預約泊位
2. 大鵬禾塘濕地公園｜粉黛花海 10 月必去
每年10月係粉黛亂子草盛放嘅時間。大鵬禾塘濕地公園的花海沿山勢延展，近看似粉紫色絨毯，遠看根本係粉色雲海，背景仲有七娘山，一片超治癒秋日風景。
園區免費入場、無需預約，佔地大、景觀多元，適合家庭散步、情侶影相兼郊遊。
地址：深圳大鵬新區南澳街道禾塘濕地園
門票：免費入場
深圳春季賞花
3. 光明農場大觀園｜櫻花節 3–4 月限定
春天開始，園內近千株櫻花逐批開放，包括關山櫻、普賢象櫻、一葉櫻等，花期約一個月。園內幾條賞櫻路線如櫻花大道、櫻緣長廊都非常上鏡。
花仙巡遊活動：
日期：3月1日至4月6日期間的星期六、日
時間：11:30／15:00／16:30
地點：景區正門至青青草原
地址：深圳光明農場大觀園
門票：49元（1.2 米以下兒童免費）
地鐵：6號線「鳳凰城站」轉 M451；或「光明街站」改乘的士
4. 三洲田櫻花林｜深圳最大櫻花林
位於鹽田區的三洲田櫻花林，是深圳其中一個最大規模的櫻花觀賞地點。每年 2 月中旬開始開花，花期一般至 3 月下旬。園區種植多款櫻花，包括中國紅、寒緋櫻、富貴櫻等，加上四面環山，影相非常靚。
地址：三洲田森林公園櫻花林
最佳拍攝時間：8–10am／4pm
交通：地鐵 8 號線「鹽田路站」D 出口後轉車約 15 分鐘
備註：屬限飛區，如需航拍需事先申請
總結
無論係秋日粉黛、簕杜鵑花瀑布，定係春季櫻花大道，深圳一年四季都有靚花睇，而且交通方便，週末快閃完全無難度。文章會持續更新 2025 各季節最新開花資訊，幫你計劃下一次深圳賞花一日遊。
