首页 > 分享 > 沪语悦读：栀子花，白兰花

沪语悦读：栀子花，白兰花

花匠小妙招
2025-01-13 00:51

作者：薛理勇

沪语改写：周红缨

讲述：洪瑛

文字、语音审核：丁迪蒙

编辑：王乙其

清末上海环球社出版《图画日报》“营业写真”专栏有张“卖花”图，从画面浪向看，卖花女子手里拿个花是带长梗个花，搭现在上海马路摊头浪卖个花明显勿一样，搿张图个配画文是迭能写个：

卖花卖花声细长，珠兰茉莉夜来香。

筠篮一只手中挽，出入公馆与宅堂。

喊哑喉咙少人买，只因小姐奶奶多改文明妆。

饰辫一条不须花朵插鬓旁。

明朝多扎花球钮子花，卖给文明女子送与文明郎。

吴友如，苏州人。清代著名画师。1884年应《申报》聘请担任《点石斋画报》主笔，画了大量画作，独立创办“吴友如画室”，汇集大部分作品，其中个《百美图》，又有伊画个大量女子生活作品，从搿些作品里大致好了解当时女子个装饰：大多数盘发、打发髻，发髻浪好插花作装饰。

进入20世纪之后，上海女子装饰有明显变化，传统发髻勿再流行，流行背后头拖条又粗又长个辫子，而辫子浪没办法插花，鲜花销路就成问题了，所以讲：“喊哑喉咙少人买，只因小姐奶奶多改文明妆，饰瓣一条不须花朵插”。迭能看来，早期所卖个花，主要用于装扮头饰个。

自然界大多数香气浓郁个花是生长勒气温偏高个热带、亚热带地区。珠兰勒我国主要生长或者种植勒福建、广东一带，开个花香气如兰，所以称珠兰、珍珠兰、金粟兰等。

中国人讲个“茉莉”，原产地是波斯，也就是现在伊朗一带，早期从海浪移过来种勒中国个南方，勒云南、广东、福建一带推广种植，“莱莉”是波斯语个音读，大多数是夜香型个花，花期邪气长，从初夏一直开到深秋，将近半年，可以勿断个采摘，经济价值蛮高个，茉莉花邪气小，花瓣垂叠，女个拿一朵朵小小个茉莉花串起来当作头饰，也好用花制作面油，商家则用鲜花制成功茉莉花茶。

“夜来香”是对交关夜香型花个统称，上海搭仔江南人所讲个“夜来香”多数是指一种勒夜里散发香味道个多年生百合科草本植物个花，所以又称“月下香”、“晚玉香”，大多数勒夜里开白颜色个花。

江南个香花早期主要来自福建、广东一带，通过海上航运搭仔贸易进入了江南，清《吴门竹枝词》里厢搿能讲:

蘋末风微六月凉，画船衔尾泊山塘。

广南花到江南卖，帘内珠兰茉莉香。

到了20世纪以后，上海女子发型发生变化，插花风俗勿再流行，交关花就拨用来做“纽子花”，就像“卖花”个配画文中所讲——“明朝多扎花球、纽子花，卖给文明女子送与文明郎”。《图画日报》称“纽子花始于西人”，估计搿种花并勿是西方人常用个佩花，而是勒特定场合辰光佩带个花，相当于现在勒表彰先进辰光胸前佩戴个“光荣花”、“大红花”。不过，胸前佩花个风俗老快就结束了。

我小个辰光，弄堂里也经常会传来吆喝声——“zi zi花，白兰花”，卖花个大多数是女性。有人认为“zi zi花”是“栀子花”，不过，《本草纲目》讲栀子是“二三月生白花，花背六出(即有6片花瓣)”，显然，勒上海叫卖个并勿是“栀子花”。实际浪伊是前头提到个“珠兰花”。而“白兰花”是木兰科常绿乔木个花，原产南洋印度尼西亚，大约摸清代拨引种福建、广东一带，通过高枝压条或者嫁接繁殖，大约摸民国以后拨引种江南，并成为卖花女所卖个最常见个花。

清代，女子买花大多用于头饰，花型要大，花瓣要偏硬，像珠兰迭能个小型花必须穿成串，民国买花则是取其香。民国女子服饰以旗袍为主，大多数女子会拿花包了绢头里向，再拿绢头囥进旗袍个大襟里，老少有人会得拿花直接挂勒外衣浪向个。